Sámi oahpaheaddjeoahpuid miehtasámi oahppomátki lea mávssolaš!

Buot ovddemus, buorre ođđa jahki buohkaide!

Iežan kantuvrras Diehtosiiddas lean geahčadeame mo mannan čakčalohkanbadji lea leamaš ja makkár sisdoallu lea leamaš oahpaheaddjeoahpuin. Lean earret eará ođđasit logadan “Miehtá Sámi Roadtrip” blogga, ja ferten giitit studeanttaid ja fágaoahpaheddjiid go fuomášedje čállit dán mátkeblogga. Lei goalmmát gearddi go Sámi allaskuvla lágidii dákkár “Miehtá Sámi” mátkki sámi oahpaheaddjestudeanttaid váste. Juohke háve dát mátki lea addán studeanttaide buori oahppama ja bohciidahttán sis ollu ođđa jurdagiid. Dáinna bloggain leat studeanttat dasa lassin juogadan fuomášumiid ja oahppama servodagain, blogga lohkkiiguin, dađi mielde go leat finadan ođđa guovlluin, sámi mánáidgárddiin ja skuvllain, sámegiellaguovddážiin ja eará ásahusain gos barget ovddidit sámegiela ja sámi kultuvrra. Bloggas leat leamaš ollu lohkkit ja muđui ledje studeanttat “oidnosis” mátkkis go viššalit serve mediijain. Studeanttaid vásáhusaid ja govvideaddji reflekšuvnnaid bokte leat sii leamaš mielde čalmmustahttet sámegielaid iešguđet diliid, sámeskuvllaid ja mánáidgárddiid hástalusaid, sámegielat oahpaheddjiid dehálaš barggu ja sámi mánáid ja ohppiid iešguđet guovlluin Sámis. Dát ságat galggaše gullot juohke beaivvi, fuomášahttet ja muittuhit man dehálaš lea beaivválaččat bargat ovddidit ja nannet sámegiela ja kultuvrra, juohke guovllus!  

Mun serven mátkái Romssa rájes go finaimet Báhpajávrri skuvllas ja Giellateknos, Norgga Árktalaš Universitehtas. Lei somá searvat duhtavaš ja movttegis studeanttaid ja fágaoahpaheddjiid fárrui. Hui bures vuostáválduimet sihke Báhpajávrri skuvllas ja Giellateknos. Isket Giellatekno, doppe leat ollu ávkkálaš siiddut sámegielat oahpaheddjiide ja earáide geat barget sámegielain http://giellatekno.uit.no/ !

Miehtá Sámi Roadtrip lea oahppomátki man atnit árvvusin ja dehálaš oassin sámi oahpaheaddjeoahpuin. Jus oktage gii lohká dán blogga, lea smiehtadeame makkár ohppui áigu álgit 2014 čavčča, de fuomáš ahte Sámi allaskuvla lea almmuhan guokte oahpaheaddjeoahpu álgit: Sámi vuođđoskuvlaoahpaheaddjeoahppu 1.-7. ja Sámi vuođđoskuvlaoahpaheaddjeoahppu 5.-10. Sámi allaskuvla fállá oahpaheaddjeoahpuid sámegillii ja geabbilis málle mielde! Eanas oahpahus lágiduvvo nehttii ja leat sullii 4-5 deaivvadeami lohkanbajis ja bargohárjehallan. Deháleamos lea ahte sámi oahpaheaddjeoahpuid vuođđun leat sámi mánát ja oahppit, miehtá Sámis. Sámi oahpaheaddjeoahput galget leat áigeguovdilat ja addit gelbbolašvuođa maid oahpaheaddjit dárbbašit áiggis áigái! Loga ja čuovo fal dieđuid ja ohcanáigemeari  Sámi allaskuvlla ruovttusiiddus, www.samiskhs.no! Searvva don ge!

Giittán mátki ja čakčalohkanbaji ovddas ja sávan buohkain leamaš ráfálaš juovlabasit ja ahte dál leat gergosat álgit ođđa jahkái, ođđa lohkanbadjái, ođđa movttain ja mihtuiguin!

Oaidnaleapmái J

Inger Elle E. Gaup

Oahpaheaddjeoahpuid oahppojođiheaddji, Sámi allaskuvla