Bloggaredaktevra ja idjárvga

Hárjehallanoahppomátki – mun lean gal maid hárjehallamen, galggašin ovdánit oahpaheaddjin studeanttaide. Gergen vuođđooahpuin 1998´is ja lean dan rájes álohii viggan dobbelii, ohcame bargovugiid, oahppanstrategiijaid ja ođđa dieđuid.  Buot buoremus liikun go beasan ságastallat,  lonohallat jurdagiid ja árvvoštallat. Dán mátkkis lean beassan buot daid vásihit ja bargat.

Lean maid beassan geahččalit bloggaredaktevran, lean fágaáššiid digaštallan ijat beaivvi nu ahte illá lean gearggan nohkestit, okta nubbi ođđa oahpaheaddjioahppoprošeaktajurdda lea njáhkalan mu girjái, lean áibbašan mánáidgárdeárgabeaivái ja váillahan buot mu bargoolbmát mánáidgárddis geat leat oahpahan ja nevvon mu. Ja manne lea ná leamáš mus?

Álkes vástádus... dan dihte go lean fitnat mánáidgárddiin, humadan bargiiguin, ja dan dihte go lean jođus studeanttaiguin ja fas beassan studeanttaiguin ovttas oahppat ja ovdánit.

Giitu J Laila