Sibylla ja Baltos Busser

Hei buohkat! Dá lea min vuosttaš čálus dan bloggas, ja nu movt mun gii čálán dal dan bloggpost’a lean ipmirdan, de leat vuordámušat maid almmis. Ii heađisge danne go vuordámušat leat jápmán ja beassan ipmila lusa, muhto danne go albmi lea badjin ja dan seamma leat vuordámušat. Min oahpaheaddji guoktá leaba hupman dán blogga birra dan rájes go vuoddjáimet  Guovdageainnus, ja dal leage áigi dahkat juoidá dainna. Lean ožžon dan stuora ovddasvástádusa čállit dan vuosttáš posta ja mun lean válljen čállit persovnnalaš perspektiivvas, go in jáhke oktage gille lohkat blogga mii lea njuolgut dušše teoriija ja fáktádieđut. So here we go!

Justte dal mun čohkkan busses gaskkal Johkamohkki ja Deartna (Tärnaby). Lean tuvrras Sámi Allaskuvlla mánáidgárdeoahpu ja vuođđoskuvlaoahpu studeanttaiguin. Mii leat sullii guoktelogis mielde dan tuvrras ja mii galgat finadit sámi skuvllain Johkamohkis, Deartnas, Áiluovttas ja Romssas. Ulbmil tuvrrain lea oahpásnuvvat eará sámeguovllu skuvllaide ja oaidnit movt sii barget. Ferten namuhit ahte in dieđe makkár vuordámušat mus ledje dan tuvrii, muhto dal in sáhte eambbo vuordit vel ollu eambbo.

Ikte mii vujiimet Guovdageainnus Johkamohkkái. Bisáneimmet Gárasavvonis gos nubbi oahpaheaddji ja moadde studeanta njuikejedje mielde. Muhttimat dieđus eai máššan, ja bonjastedje vuolamárffiid ja snuvssaid dan guhkes tuvrii. Váhčiris dahje Gällevares nu movt eatnasat dovdet dan báikki mii galggaimet boradit. Mus lei njálbmi bealljis bealljái go oidnen Sibylla ja Baltos Busser buoremus vuoddji EVER lizzom jorgalii busse dan guvlui. Meinejin juo njuiket olggos vuoi ollen ovddemus diŋgot skrovmål, muhto váibmu cuovkanii go fuomášin ahte son vujii meaddel ovtta eará borranbáikái. Juojuo, gal dat dohkkii dat karbonade maid mun osten, ja eahket mielde mun vajálduhtedin dan váivves dáhpáhusa.

Eahket ii šaddan nu ollu čuovgadat go oidnen galbba olggobealde viesu gos galggaimet orrut. Villa Åsgård lei stuora rukses viessu ovtta dieva alde. Gullen muhttimiid hupmamin olggobealde “House on the haunted hill” birra, ja dovdu ii šaddan buoret. Muhto, eallin dat goit čájehii dan čuvges beali maid. Farmen Mikkel ii jienastuvvon olggos Robinson TV-ráiddus ja viessu lei vuogas ja doppe bohte buorit nahkárat.

Iđđes galggaimet vuolgit dan vuosttaš skuvlla galledit. Leimmet árrat badjin ja dohko mii manaimet measta viega, go vuordámušat ledje sturron ijas.

*BEEEEEEP* De nogai dat bloggposta. In čále maidege dan birra maid lean vásihan, go odne galget vel 5 eará studeanta muitalit iežaset vásáhusaid. Sáhtán muitalit ahte lean oahppan ollu dan tuvrras, dál juo, ja vuorddan ahte juohke báiki bidjá mu jurddášit nu movt Johkamohki dagai.

Maŋemus vel, mun lean Aslat Ante ja mis lea hui buorre busse!